امریکی صدر ڈونلڈ ٹرمپ نے ایران کو خبردار کیا ہے کہ شرائط تسلیم نہ کرنے کی صورت میں شدید حملے کیے جائیں گے۔ انہوں نے کہا کہ تعاون کی صورت میں آبنائے ہرمز سب کے لیے کھول دی جائے گی۔
امریکی صدرٹرمپ نے اپنے سوشل میڈیا پلیٹ فارم ’ٹروتھ سوشل‘ پر جاری بیان میں ایران کو سخت پیغام دیتے ہوئے کہا ہے کہ اگر تہران طے شدہ شرائط کو قبول کر لیتا ہے تو جاری کشیدگی کا خاتمہ ممکن ہو جائے گا۔ ان کے مطابق ایسی صورت میں ایپک فیوری نامی کارروائی ختم کر دی جائے گی اور آبنائے ہرمز کو ایران سمیت تمام ممالک کے لیے کھول دیا جائے گا۔
صدر ٹرمپ نے کہا کہ ایران کی جانب سے شرائط ماننے کی صورت میں آبنائے ہرمز میں تمام ممالک کو بلا رکاوٹ رسائی دی جائے گی، جس سے خطے میں بحری آمدورفت معمول پر آ سکے گی۔ ان کا کہنا تھا کہ اس اقدام سے عالمی تجارت کو بھی استحکام حاصل ہوگا۔
تاہم امریکی صدر نے واضح کیا کہ اگر ایران نے ان شرائط کو تسلیم نہ کیا تو امریکا کی جانب سے فوجی کارروائی دوبارہ شروع کی جائے گی، جو پہلے کے مقابلے میں کہیں زیادہ شدید اور وسیع پیمانے پر ہوگی۔ انہوں نے خبردار کیا کہ ایسی صورت میں حملوں کی شدت میں نمایاں اضافہ کیا جائے گا۔
امریکہ اور ایران کے درمیان کشیدگی ایک طویل عرصے سے جاری ہے، جس میں علاقائی اثر و رسوخ اور سلامتی کے معاملات اہم کردار ادا کرتے ہیں۔ آبنائے ہرمز عالمی سطح پر تیل کی ترسیل کا ایک اہم راستہ ہے، جہاں کسی بھی قسم کی کشیدگی کے عالمی معیشت پر براہِ راست اثرات مرتب ہو سکتے ہیں۔
دوسری جانب صدر ٹرمپ نے وائٹ ہاؤس کے مشرقی حصے میں زیر تعمیر نئے عظیم الشان ہال سے متعلق بھی وضاحت پیش کی۔ انہوں نے کہا کہ اس منصوبے کی لاگت میں اضافہ اس کے حجم اور معیار کو بہتر بنانے کی وجہ سے ہوا ہے۔ ان کے مطابق ابتدائی تخمینہ دو سو ملین ڈالر تھا، تاہم اب یہ منصوبہ تقریباً دوگنے حجم کے ساتھ چار سو ملین ڈالر سے کم لاگت میں مکمل ہوگا۔
صدر ٹرمپ نے مزید کہا کہ یہ نیا ہال مستقبل کی اہم سرکاری تقریبات، اجلاسوں اور حلف برداری کی تقریبات کے لیے نہایت موزوں ہوگا۔ ان کے مطابق منصوبہ مقررہ وقت سے پہلے اور بجٹ کے اندر مکمل کیا جا رہا ہے، جبکہ بعض ذرائع ابلاغ نے اس حوالے سے غلط تاثر دینے کی کوشش کی۔