بین الاقوامی مالیاتی فنڈ (آئی ایم ایف) کے اصرار پر گزشتہ دو برس سے مارکیٹ پر مبنی شرح مبادلہ کے نتیجے میں روپے کے مقابلے میں امریکی ڈالر کی قدر میں 67 روپے اضافہ ہوا جس کے باعث افراط زر اور سود کی ادائیگیوں میں اضافہ ہوا ہے۔
ٹربیبون کی رپورٹ کے مطابق ٹیکس ایڈوائزری فرم تولا ایسوسی ایٹس کے مطابق اگر آئی ایم ایف کا اصرار نہ ہوتا تو اکتوبر کے آخر تک روپے کی قدر ڈالر کے مقابلے میں 211 روپے 5 پیسے ہوتی۔
شرح مبادلہ کے انتظام کے لیے ذمہ دار مرکزی بینک نے کہتا رہا ہے کہ روپے اور ڈالر کی موجودہ شرح مارکیٹ توقعات کے مطابق ہے۔ تاہم ٹولا ایسوسی ایٹس کا مؤقف ہے کہ گزشتہ تین برس میں روپے کی بلند قدر نے پاکستان کی معیشت پر منفی اثر ڈالا ہے۔
فرم کا دعویٰ ہے کہ اگر روپے اور ڈالر کی شرح مبادلہ کو اس کی تخمینہ شدہ حقیقی اوسط قیمت 211.5 روپے کی عکاسی کرنے کے لیے ایڈجسٹ کیا جائے تو یہ اہم معاشی فوائد کا باعث بن سکتا ہے۔
انہوں نے کہا کہ آئی ایم ایف کی وجہ سے ستمبر 2022 میں روپیہ 238 روپے ڈالر کے قریب ٹریڈ کر رہا تھا لیکن اسحاق ڈار کے بطور وزیر خزانہ بننے کے پہلے ہفتے میں بغیر کسی بنیادی معاشی تبدیلی کے ڈالر 218 تک پہنچ گیا۔
گزشتہ مہینےنائب وزیر اعظم اسحاق ڈار نے کہا تھا کہ اقتصادی بنیادی اصولوں کی بنیاد پر روپے کی قدر 240 روپے فی ڈالر سے زیادہ نہیں ہونی چاہیے۔ انہوں نے لچکدار شرح مبادلہ کے نظام کی بھی مخالفت کی اور یہ دلیل دی کہ اس سے معیشت اور عام عوام دونوں کو نقصان پہنچ رہا ہے۔
ایڈوائزری فرم کے مطابق اگر روپیہ اپنی تخمینی تین سالہ اوسط 211.5 کے ارد گرد ٹریڈ کر رہا ہوتا تو جولائی تا اکتوبر کی مدت کے لیے اوسطاً 8.7 فیصد افراط زر 4.67فیصد کی تنزلی میں بدل سکتا تھا۔