سائنس کی دنیا میں نوبیل انعام کو غیر معمولی سائنسی خدمات کے اعتراف کے طور پر دیکھا جاتا ہے۔ 2026 کے نوبیل انعامات میں کیمسٹری کے شعبے میں بھی ایسی ہی اہم تحقیق کو عالمی سطح پر تسلیم کیا گیا ہے۔
سویڈن کی نوبیل کمیٹی نے بدھ کو اعلان کیا ہے کہ فرانس کے سائنس دان ہنری کگان اور جاپان کے کینسو سوائی کو 2026 کا نوبیل انعام برائے کیمسٹری دیا گیا ہے۔ دونوں سائنس دانوں کو یہ اعزاز ’’نان لینیئر ایفیکٹس اِن ایسِمیٹرک آرگینک سنتھیسس‘‘ کی دریافت پر دیا گیا ہے۔
کیمسٹری کی نوبیل کمیٹی کے چیئرمین ہائنر لنکے نے وضاحت کرتے ہوئے کہا کہ اس سال کا انعام کیمسٹری کی بنیادی نوعیت کی تحقیق سے متعلق ہے۔ انہوں نے بتایا کہ بہت سے سالمات دو مختلف شکلوں میں پائے جاتے ہیں جو ایک دوسرے کا آئینہ دار دکھائی دیتے ہیں، لیکن ایک جیسے نہیں ہوتے۔
انہوں نے اس کی مثال انسانی ہاتھوں سے دی۔ دونوں ہاتھ ایک دوسرے کے آئینے کی طرح ہوتے ہیں، مگر انہیں اس طرح ایک دوسرے کے اوپر نہیں رکھا جا سکتا کہ وہ مکمل طور پر ایک جیسے نظر آئیں۔ ایسی خصوصیت رکھنے والے سالمات کو ’کائیرل‘ کہا جاتا ہے، جو یونانی زبان کے لفظ ’ہاتھ‘ سے نکلا ہے۔
کگان اور سوائی کی تحقیق کا تعلق اسی طرح کے پیچیدہ سالماتی عمل کو سمجھنے سے ہے، جس میں کیمیائی ردعمل کے دوران سالمات کی مخصوص ساخت اور ان کے باہمی اثرات اہم کردار ادا کرتے ہیں۔ نوبیل کمیٹی کے مطابق ان کی دریافتیں کیمسٹری میں بنیادی اہمیت رکھتی ہیں۔
کیمسٹری کا نوبیل انعام رواں ہفتے دیا جانے والا تیسرا نوبیل انعام ہے۔ اس سے قبل پیر کو طب اور منگل کو طبیعیات کے نوبیل انعامات کا اعلان کیا گیا تھا۔
نوبیل انعامات سویڈش موجد اور کاروباری شخصیت الفریڈ نوبیل کی وصیت کے تحت قائم کیے گئے تھے۔ سائنس، ادب اور امن کے شعبوں میں یہ انعامات 1901 سے دیے جا رہے ہیں، اگرچہ عالمی جنگوں کے دوران چند مواقع پر ان کا سلسلہ متاثر ہوا۔
الفریڈ نوبیل خود کیمسٹ تھے اور انہوں نے 19ویں صدی میں اپنی ایجادات، بالخصوص بارود اور ڈائنامائٹ سے بڑی دولت کمائی تھی۔ بعد میں سویڈن کے مرکزی بینک کی مالی معاونت سے معاشیات کا نوبیل انعام بھی اس سلسلے میں شامل کیا گیا۔
کیمسٹری کے نوبیل انعام کے ذریعے ماضی میں جوہری انشقاق اور جینیاتی ترتیب معلوم کرنے کی تکنیکوں سمیت کئی اہم سائنسی دریافتوں کو بھی تسلیم کیا جا چکا ہے۔
2025 کا کیمسٹری کا نوبیل انعام سوسومو کٹاگاوا، رچرڈ روبسن اور عمر یاغی کو دیا گیا تھا۔ انہیں میٹل آرگینک فریم ورکس کی تیاری پر یہ اعزاز ملا تھا، جو ایسے سالماتی ڈھانچے ہیں جنہیں موسمیاتی تبدیلی اور صاف پانی کی کمی جیسے مسائل سے نمٹنے کے لیے استعمال کیا جا سکتا ہے۔
2026 کے نوبیل کیمسٹری انعام کے دونوں فاتحین کو 10 دسمبر کو اسٹاک ہوم میں ہونے والی تقریب کے دوران سویڈن کے بادشاہ کارل شانزدہم گستاف، تمغے پیش کریں گے۔ یہ تقریب الفریڈ نوبیل کی برسی کے موقع پر منعقد کی جاتی ہے، جس کے بعد اسٹاک ہوم سٹی ہال میں روایتی ضیافت بھی ہوگی۔
کگان اور سوائی مجموعی طور پر 12 ملین سویڈش کرونا کی انعامی رقم بھی تقسیم کریں گے، جو تقریباً 12 لاکھ ڈالر بنتی ہے۔ نوبیل امن انعام اس سے الگ اوسلو میں دیا جاتا ہے، کیونکہ یہ واحد نوبیل انعام ہے جس کی تقریب سویڈن کے بجائے ناروے میں منعقد ہوتی ہے۔