یونان کے مشہور جزیرے کریٹ کے جنگلات میں آگ لگنے کے واقعے کے بعد 35 سالہ اسرائیلی سیاح کو مبینہ طور پر آگ بھڑکانے کے الزام میں گرفتار کر لیا گیا ہے۔
یونانی میڈیا کے مطابق آگ اس وقت لگی جب سیاح نے ایک کرائے کی وِلا کے صحن میں باربی کیو کے لیے آگ جلائی، جبکہ اسے پہلے سے آتش زدگی کے خطرے کے باعث آگ جلانے سے احتیاط کا کہا گیا تھا۔
یونانی میڈیا نیوزمیں بتایا گیا ہے کہ وِلا کے مالک نے سیاحوں کو باربی کیو کے حوالے سے پہلے سے واضح ہدایات دی تھیں اور مبینہ طور پر یہ ہدایت تحریری شکل میں بھی فراہم کی گئی تھی۔ اس کے باوجود وِلا کے صحن میں باربی کیو کے لیے آگ جلائی گئی، جس کے بعد وہاں سے آگ پھیلنے کی اطلاعات سامنے آئیں۔
واقعہ جمعے کی شام تقریباً 7 بج کر 10 منٹ پر جنوبی ریتھیمنو کے علاقے میں سیلیا نامی گاؤں کے قریب پیش آیا۔ یونانی فائر سروس کی ابتدائی تحقیقات کے مطابق آگ اسی ولا کے صحن سے شروع ہوئی جہاں اسرائیلی سیاحوں کا ایک گروپ قیام پذیر تھا۔
رپورٹس کے مطابق اس وقت علاقے میں تیز ہوائیں چل رہی تھیں۔ باربی کیو سے نکلنے والی چنگاریاں قریبی خشک جھاڑیوں تک پہنچیں، جس کے بعد آگ نے تیزی سے پھیلنا شروع کر دیا۔ خشک موسم اور تیز ہوا نے صورتِ حال کو مزید سنگین بنا دیا اور آگ کے قریب موجود آبادیوں کے لیے بھی خطرہ پیدا ہو گیا۔
آگ پر قابو پانے کے لیے یونانی حکام نے بڑے پیمانے پر امدادی کارروائی کی۔ 60 سے زائد فائر فائٹرز کے علاوہ خصوصی فائر فائٹنگ یونٹس، درجنوں گاڑیاں، ہیلی کاپٹرز اور پانی کے ٹینکرز بھی موقع پر پہنچے۔ حکام نے احتیاطی اقدام کے طور پر قریبی آبادیوں کو خالی کرنے کے احکامات بھی جاری کیے۔
فائر فائٹرز نے تقریباً چار گھنٹے کی مسلسل کوششوں کے بعد آگ پر قابو پا لیا۔ تاہم واقعے کے بعد حکام نے تحقیقات شروع کر دیں تاکہ آگ لگنے کی اصل وجہ اور اس میں مبینہ طور پر سیاح کے کردار کا تعین کیا جا سکے۔
گرفتار کیے گئے سیاح کو اتوار کے روز ریتھیمنو کی عدالت میں پیش کیا جانا تھا۔ استغاثہ کی جانب سے اس کی حراست میں توسیع کی درخواست کیے جانے کی توقع ہے۔ عدالت میں مزید کارروائی کے دوران یہ طے کیا جائے گا کہ اس معاملے میں اس پر کیا الزامات عائد کیے جاتے ہیں اور قانونی کارروائی کس سمت آگے بڑھتی ہے۔
یہ واقعہ ایسے وقت میں پیش آیا ہے جب یونان موسم گرما کے دوران جنگلات کی آگ کے خطرے سے دوچار ہے۔ ملک میں شدید گرمی، خشک موسم اور تیز ہواؤں کے باعث معمولی سی چنگاری بھی بڑے پیمانے پر آگ کا سبب بن سکتی ہے۔ اسی وجہ سے زیادہ خطرے والے دنوں میں حکام باربی کیو، جھاڑیوں کو جلانے اور ایسی سرگرمیوں پر پابندی عائد کرتے ہیں جن سے چنگاری یا آگ پیدا ہونے کا امکان ہو۔
یونانی حکام نے جنگلات میں آگ کے خطرے کے پیش نظر حفاظتی قوانین پر سختی سے عمل درآمد شروع کر رکھا ہے۔ ان قوانین کی خلاف ورزی پر بھاری جرمانوں کے ساتھ فوجداری کارروائی بھی ہو سکتی ہے۔
حکام کے مطابق اس واقعے میں گرفتار سیاح کے خلاف قانونی کارروائی جاری ہے، تاہم حتمی ذمہ داری اور الزامات کا تعین عدالت اور تحقیقات کے نتائج کی بنیاد پر ہوگا۔