فیصل آباد میں میڈیسن فیکٹری کی آڑ میں اربوں کا آن لائن فراڈ بے نقاب، 149 افراد گرفتار

فیصل آباد میں تھانہ بلوچنی کےعلاقے 54 رب میں حساس ادارے اور ایف آئی اے سائبر کرائم وِنگ نے مشترکہ کارروائی کرتے ہوئے سابق چیئرمین فیسکو، مسلم لیگ (ن) کے رہنما تحسین اعوان کی میڈیسن فیکٹری پر چھاپہ مارا۔ جہاں سے 149 ملکی و غیر ملکی افراد کو حراست میں لیا گیا۔
فیصل آباد کے علاقے بلوچنی میں حساس ادارے اور ایف آئی اے سائبر کرائم وِنگ کی مشترکہ کارروائی میں اربوں روپے کے آن لائن فراڈ کا بڑا نیٹ ورک بے نقاب ہو گیا۔
کارروائی سابق چیئرمین فیسکو اور مسلم لیگ (ن) کے رہنما تحسین اعوان کی ملکیتی میڈیسن فیکٹری میں کی گئی، جہاں سے 149 ملکی و غیر ملکی افراد کو حراست میں لیا گیا۔
گرفتار افراد میں 73 غیرملکی مرد و خواتین شامل ہیں، جن کا تعلق چین، نائجیریا، فلپائن، سری لنکا، بنگلہ دیش اور میانمار سے بتایا جا رہا ہے۔ ایف آئی اے ذرائع کے مطابق زیرِ حراست ملزمان پونزی اسکیمز اور جعلی سرمایہ کاری کے جھانسے سے شہریوں سے لاکھوں روپے ہتھیاتے تھے۔
فیکٹری سے بڑی تعداد میں کمپیوٹرز، ایل سی ڈیز اور دیگر ڈیجیٹل ڈیوائسز بھی برآمد کی گئیں، جو مبینہ طور پر فراڈ میں استعمال ہو رہی تھیں۔ زیر حراست تمام افراد کے خلاف مختلف دفعات کے تحت 7 مقدمات درج کیے گئے ہیں اور تفتیش کا عمل جاری ہے۔ ملزمان کو آج ایف آئی اے کی عدالت میں پیش کیا جائے گا۔
اس کے علاوہ، حساس ڈیٹا فروخت کرنے میں ملوث دو افراد کو بھی فیصل آباد سے گرفتار کیا گیا ہے، جن سے انتہائی اہم نوعیت کا ڈیجیٹل مواد برآمد ہوا ہے۔ حکام کا کہنا ہے کہ یہ کارروائی سائبر کرائم کے خلاف جاری بڑے آپریشن کا حصہ ہے، جس کا دائرہ مزید وسیع کیا جا رہا ہے۔