پاکستان شوبز انڈسٹری کے سینئر اداکار شہود علوی کی دوسری اور چھوٹی بیٹی اریجہ علوی بھی شادی کے بندھن میں بندھ گئیں۔
اداکار شہود علوی کی صاحبزادی اریجہ علوی کی شادی اور ولیمے کی تصاویر اور ویڈیوز سوشل میڈیا پر وائرل ہوگئی ہیں جسے مداحوں کی جانب سے بےحد پسند کیا جارہا ہے۔
شہود علوی کی بڑی بیٹی آریبہ جو کہ ایک اداکارہ بھی ہیں، حال ہی میں شادی کے بندھن میں بندھی اور اب ان کی دوسری بیٹی اریجہ نے بھی شادی کر لی ہے۔
اریجہ علوی نے بارات کے دن گہرے سرخ رنگ کا خوبصورت غرارہ پہنا، جو مشرقی ثقافت کی مکمل عکاسی کرتا تھا اور شہود علوی کی آنکھوں میں جذبات کی گہرائی جھلک رہی تھی۔
ولیمے کی تقریب میں اریجہ نے آئس بلو رنگ کا شاندار لباس زیب تن کیا، جس میں وہ کسی شہزادی کی مانند دلکش نظر آرہی تھیں۔
شہود علوی نے سوشل میڈیا پر اپنی بیٹی کے ولیمے کی تصاویر شیئر کرتے ہوئے لکھا کہ بیٹیاں اللہ کا انمول تحفہ ہوتی ہیں اور جب وہ رخصت ہوتی ہیں تو باپ کا دل بھی ان کے ساتھ چلا جاتا ہے۔
رخصتی کی ویڈیو میں شہود علوی نے جذباتی آواز میں کہا کہ کہا جاتا ہے کہ بیٹیوں والے والد خوش قسمت ہوتے ہیں مگر ان کی رخصتی کا دکھ الفاظ سے بیان نہیں کیا جا سکتا۔
تاہم سوشل میڈیا پر اداکار شہود علوی کی اس ویڈیو نے مداحوں کے دلوں کو چھو لیا۔
واضح رہے کہ شہود علوی ایک ورسٹائل اداکار اور بیٹیوں کے محب والد ہیں جو کبھی بھی اپنی بیٹیوں کے لیے اپنی محبت ظاہر کرنے میں ہچکچاہٹ محسوس نہیں کرتے، انہوں نے ہمیشہ اپنے خاندان سے اپنی محبت کا اظہار کیا ہے۔