جنوبی امریکی ملک پیراگوئے کے معروف ڈیجیٹل بینک ’وئینو‘ (ueno) کے محض پانچ دنوں کے اندر اچانک دیوالیہ ہونے اور 30 لاکھ سے زائد صارفین کے سیونگ اکاؤنٹس منجمد ہونے کے بعد ملک میں شدید ترین سیاسی و مالیاتی بحران پیدا ہو گیا ہے۔ اس سکینڈل کے نتیجے میں صدر سانٹیاگو پینیا مستعفی ہونے کی کوشش کے بعد مواخذے کے ذریعے عہدے سے برطرف کر دیے گئے ہیں، جس کے بعد نائب صدر پیڈرو الیانا نے نئے صدر کے طور پر حلف اٹھا لیا ہے۔
پیراگوئے کے حکام نے سابق صدر کو گرفتار کر کے عسکری حراست گاہ منتقل کر دیا ہے، جبکہ پراسیکیوٹرز نے ان پر ذاتی مفاد کے لیے اختیارات کے ناجائز استعمال اور امانت میں خیانت کے الزامات عائد کیے ہیں۔
پیراگوئے کی کُل 65 لاکھ کی آبادی میں سے نصف کے قریب افراد اس بینک میں اکاؤنٹ رکھتے تھے۔ 2021 میں قائم ہونے والے اس ڈیجیٹل بینک میں جون کے مہینے تک سرکاری ملازمین کے پینشن فنڈ سمیت مختلف عوامی اداروں کے 85 کروڑ ڈالر موجود تھے۔
تاہم، بعض کمپنیوں کو حد سے زیادہ قرضے فراہم کرنے کی اندرونی ریگولیٹری رپورٹس میڈیا میں لیک ہونے اور کم از کم مالیاتی استحکام کی شرائط پوری نہ کرنے پر سینٹرل بینک نے رواں ہفتے منگل کے روز بینک کو اپنے کنٹرول میں لے لیا تھا۔
حکومت نے بتایا ہے کہ ڈپازٹ گارنٹی اسکیم کے تحت 12 لاکھ کے قریب چھوٹے بچت کنندگان کو 16 کروڑ ڈالر ادا کر دیے گئے ہیں، تاہم لاکھوں صارفین کے کھاتے اب بھی منجمد ہیں۔
اس مالیاتی اسکینڈل کے مرکزی کرداروں میں سابق صدر سانٹیاگو پینیا اور پیراگوئے کے مرکزی بینک کے حال ہی میں مستعفی ہونے والے سربراہ کارلوس کاروالو شامل ہیں۔
سانٹیاگو پینیا مارچ 2025 تک اس بینک کی مالک ہولڈنگ کمپنی میں بزنس پارٹنر رہے تھے، جبکہ 2023 میں صدر بننے کے بعد انہوں نے وئینو کے سابق سربراہ کارلوس کاروالو کو ہی ملک کے مرکزی بینک کا چیف مقرر کیا تھا۔
کارلوس کاروالو پر بھی جعلی سرکاری دستاویزات کی تیاری اور مالی بے ضابطگیوں کے الزامات کے تحت مقدمہ درج کر کے عدالت سے وارنٹ گرفتاری حاصل کر لیا گیا ہے۔
سابق صدر پینیا اور ان کے قانونی وکیل ریکارڈو پریڈا نے ان الزامات کی تردید کرتے ہوئے موقف اختیار کیا ہے کہ وہ بے گناہ ہیں اور ثبوتوں کے بغیر صدر کے مواخذے سے مالیاتی نظام کا اعتماد مزید مجروح ہوا ہے۔
دوسری جانب اپوزیشن اور معاشی ماہرین نے اس واقعے کو پیراگوئے کی جمہوری تاریخ کا سب سے بڑا مالیاتی و سیاسی اسکینڈل قرار دیا ہے۔
سابق وزیرِ خزانہ اور ماہرِ معیات مانوئل فریرا کے مطابق یہ موبائل ایپ کے ذریعے کی جانے والی جدید دور کی ڈکیتی تھی جس میں صدر خود ملوث رہے۔
تجزیہ کاروں کا کہنا ہے کہ اس بحران سے جنوبی امریکا میں پیراگوئے کی بطور ایک مستحکم سرمایہ کاری کے مرکز کی ساکھ کو شدید نقصان پہنچا ہے۔