پاکستان کے وزیر داخلہ سید محسن نقوی ایران کے دارالحکومت تہران پہنچ گئے، جہاں وہ ایرانی حکام سے دو طرفہ تعلقات اور باہمی دلچسپی کے امور پر مذاکرات کریں گے۔ ایرانی وزیر داخلہ اسکندر مومنی نے تہران کے ہوائی اڈے پر اپنے پاکستانی ہم منصب کا استقبال کیا۔
ایران کی نیوز ایجنسی ’مہر نیوز‘ کے مطابق ایرانی وزیر داخلہ اسکندر مومنی نے تہران کے ہوائی اڈے پر پاکستانی وزیر داخلہ کا استقبال کیا۔ دونوں وزرا کے درمیان مذاکرات میں باہمی تعاون اور علاقائی صورتِ حال سمیت مختلف امور زیرِ بحث آنے کا امکان ہے۔
محسن نقوی کا دورۂ ایران ایک ماہ بعد ہو رہا ہے۔ گزشتہ ماہ ایرانی وزیر داخلہ اسکندر مومنی نے اسلام آباد کا دورہ کیا تھا، جہاں انہوں نے اپنے پاکستانی ہم منصب سے ملاقات میں دو طرفہ امور پر بات چیت کی تھی۔
پاکستان نے حالیہ عرصے میں ایران اور امریکا کے درمیان کشیدگی کم کرنے کے لیے سفارتی کوششوں میں اہم کردار ادا کیا ہے۔ قطر کے ساتھ مل کر پاکستان نے جون میں ایران اور امریکا کے درمیان تنازع ختم کرنے کے لیے مفاہمتی یادداشت کے قیام میں بھی کردار ادا کیا تھا۔
تاہم ایران کا مؤقف ہے کہ امریکا کی جانب سے مفاہمتی یادداشت کی خلاف ورزی کے بعد تہران نے آبنائے ہرمز کو دوبارہ بند کر دیا ہے۔
ایران کا کہنا ہے کہ امریکا کی جانب سے مفاہمتی یادداشت کی خلاف ورزیاں ختم ہونے اور ان خلاف ورزیوں کے نتیجے میں ہونے والے نقصانات کا ازالہ کیے جانے کے بعد آبنائے ہرمز کو دوبارہ کھولا جائے گا۔
محسن نقوی کا دورۂ تہران ایسے وقت میں ہو رہا ہے جب پاکستان خطے میں کشیدگی کم کرنے اور ایران سمیت ہمسایہ ممالک کے ساتھ سفارتی روابط مضبوط بنانے کے لیے سرگرم ہے۔