رونالڈو اور جارجینا نے بڑی تقریب کے بجائے گھر میں شادی کیوں کی؟ پہلی تصاویر وائرل
شادی کے بعد رونالڈو نے اپنے فٹبال کیریئر کے حوالے سے بھی اہم اشارہ دے دیا
-
ویب ڈیسک -
عالمی شہرت یافتہ پرتگالی فٹبالر کرسٹیانو رونالڈو اور ان کی دیرینہ ساتھی جارجینا روڈریگز کی نجی شادی کی پہلی تصاویر سامنے آگئی ہیں جس میں دونوں کو اپنے پانچ بچوں کے ہمراہ گھر کے لیونگ روم میں شادی کی تقریب کے دوران دیکھا جاسکتا ہے۔
رونالڈو اور جارجینا نے 11 اگست 2026 کو پرتگال کے شہر کاسکائس میں واقع اپنی رہائش گاہ پر ایک مختصر سول تقریب میں شادی کی جس میں ان کے پانچ بچے اور قریبی افراد شریک ہوئے جبکہ جوڑے نے کسی بڑی اور پُرتعیش تقریب کے بجائے نجی انداز کو ترجیح دی۔
شادی کے موقع پر دونوں نے لگژری فیشن برانڈ کے ملبوسات زیب تن کیے۔ جارجینا نے روایتی عروسی لباس کے بجائے سفید سلک اسکرٹ سوٹ کا انتخاب کیا جبکہ رونالڈو ہلکے خاکی رنگ کے سوٹ میں نظر آئے۔ بچوں کے لباس بھی سفید اور ہلکے رنگوں سے ہم آہنگ رکھے گئے تھے۔
جارجینا کے مطابق وہ بچپن میں ایک شاندار اور بڑی شادی کا خواب دیکھا کرتی تھیں تاہم وقت کے ساتھ ان کی ترجیحات بدل گئیں اور وہ اپنے شریکِ حیات اور بچوں کے ساتھ ایک پرسکون اور ذاتی تقریب کو زیادہ اہمیت دینے لگیں۔ جوڑے نے مستقبل میں اہلِ خانہ اور دوستوں کے ساتھ ایک بڑی تقریب منعقد کرنے کا امکان بھی ظاہر کیا ہے۔
شادی کے بعد رونالڈو نے اپنے فٹبال کیریئر کے حوالے سے بھی اہم اشارہ دیا اور بتایا کہ 2026-27 کا سیزن ان کے کیریئر کا آخری سیزن ہوسکتا ہے تاہم انہوں نے تاحال باضابطہ ریٹائرمنٹ کا اعلان نہیں کیا۔