ایران نے دعویٰ کیا ہے کہ اس نے متحدہ عرب امارات کے شہر دبئی میں یوکرین کے اینٹی ڈرون سسٹم کے ایک گودام پر حملہ کر کے تباہ کر دیا ہے۔ ایران کے مطابق یہ گودام مبینہ طور پر امریکی افواج کی مدد کے لیے استعمال ہو رہا تھا۔
ایرانی میڈیا کے مطابق پاسدارانِ انقلاب کے خاتم الانبیاء سینٹرل ہیڈکوارٹر کے ترجمان نے ہفتے کے روز بیان میں کہا ہے کہ دبئی میں امریکی فوج کے ٹھکانوں کو نشانہ بنانے کے دوران اس گودام کو بھی نشانہ بنایا گیا جہاں یوکرین کے اینٹی ڈرون سسٹمز موجود تھے۔
پاسدارانِ انقلاب کے مطابق حملے کے نتیجے میں گودام مکمل طور پر تباہ ہوگیا، جب کہ موقع پر موجود 21 یوکرینی اہلکاروں کی ہلاکتوں کا خدشہ بھی ظاہر کیا جا رہا ہے۔ ترجمان کے مطابق یہ کارروائی پاسدارانِ انقلاب کی فضائی اور بحری فورس نے مشترکہ طور پر انجام دی۔
یہ کارروائی ایسے وقت میں سامنے آئی ہے جب یوکرین کے صدر ولادیمیر زیلینسکی متحدہ عرب امارات کے دورے پر موجود ہیں۔
ہفتے کے روز یوکرینی صدر نے اماراتی ہم منصب شیخ محمد بن زید النہیان سے ابوظہبی میں ملاقات کی، جس میں دونوں ممالک کے درمیان دوطرفہ تعاون کو فروغ دینے پر اتفاق کیا گیا۔
یوکرین کی جانب سے جاری بیان کے مطابق ملاقات میں یو اے ای میں موجود یوکرینی فوجی ماہرین کی جانب سے ایرانی ڈرونز کا مقابلہ کرنے کی کوششوں کو سراہا گیا۔
دونوں رہنماؤں نے متحدہ عرب امارات اور وسیع خطے کی سکیورٹی صورت حال پر بھی تفصیلی گفتگو کی، جس میں آبنائے ہرمز کی ناکہ بندی اور اس کے عالمی تیل مارکیٹ پر ممکنہ اثرات بھی زیرِ غور آئے۔
بیان کے مطابق دونوں فریقین نے چیلنجز سے نمٹنے کے لیے ممکنہ اقدامات پر تبادلہ خیال کیا، سیکیورٹی اور دفاع کے شعبوں میں تعاون کو مزید وسعت دینے پر بھی اتفاق کیا۔ واضح رہے کہ یوکرین نے حال ہی میں سعودی عرب کے ساتھ بھی دفاعی تعاون کا معاہدہ کیا ہے۔