جہلم: ایس ایچ او اور 5 پولیس اہلکاروں سمیت 300 افراد سیلاب میں پھنس گئے، ایک کانسٹیبل بہہ گیا

پنجاب کے ضلع جہلم میں طوفانی بارشوں کے بعد پیدا ہونے والی سیلابی صورتحال نے خطرناک رخ اختیار کر لیا ہے۔ تھانہ چوٹالہ کے ایس ایچ او سمیت چھ پولیس اہلکار سیلابی ریلے میں پھنس گئے۔ اہلکار جان بچانے کے لیے ٹریکٹر ٹرالی میں بیٹھے رہے اور پانی کے تیز بہاؤ کے باعث کئی گھنٹوں تک محصور رہے۔
سیلابی پانی کی شدت اس قدر تھی کہ ریسکیو ٹیموں کو اہلکاروں کو نکالنے میں شدید مشکلات کا سامنا رہا۔ عملے کو محفوظ مقام پر منتقل کرنے کے لیے امدادی کارروائیاں کی گئیں تاہم مسلسل بارش اور تیز بہاؤ نے ریسکیو مشن کو دشوار بنا دیا۔
ضلعی انتظامیہ اور ریسکیو اداروں نے اہلکاروں کی بحفاظت بازیابی کے لیے بھرپور کوششیں کیں اور انہیں بحٓفاظت ریسکیو کرلیا گیا۔
حکام کا کہنا ہے کہ علاقے میں ہنگامی حالت نافذ ہے جبکہ شہریوں سے اپیل کی گئی ہے کہ وہ خطرناک علاقوں میں جانے سے گریز کریں۔
جہلم اور گردونواح میں حالیہ بارشوں کے باعث متعدد علاقے زیر آب آ چکے ہیں، اور صورتحال مزید خراب ہونے کا خدشہ ظاہر کیا جا رہا ہے۔