حکومت نے شوگر ملز مالکان کے سامنے گھٹنے ٹیکتے ہوئے چینی کی ایکس مل قیمت 25 روپے فی کلو بڑھا دی، جس کے بعد ہول سیل اور ریٹیل سطح پر قیمت میں ہوشربا اضافہ دیکھنے میں آیا۔ چینی کی قیمت 200 روپے کلو تک پہنچ گئی ہے۔
حکومت نے چینی کی ایکس مل قیمت 140 روپے سے بڑھا کر 165 روپے فی کلو مقرر کر دی، مگر شوگر ملز مالکان اب بھی اس پر راضی نہیں۔ ان کا کہنا ہے کہ چینی کی پیداواری لاگت 185 روپے فی کلو تک جا پہنچی ہے، اس لیے 165 روپے میں فروخت ممکن نہیں۔
اس سے قبل مل مالکان 140 روپے ایکس مل قیمت کے باوجود چینی 180 روپے فی کلو میں بیچ رہے تھے، جس سے فی کلو 40 روپے اضافی منافع حاصل کیا گیا۔
تخمینے کے مطابق صرف 30 لاکھ ٹن چینی کی فروخت سے مل مالکان نے 1 کھرب 20 ارب روپے تک منافع حاصل کیا۔ منافع خوری کے باعث شوگر ملز نے ہول سیل مارکیٹ میں چینی کی سپلائی روک دی، جس سے مارکیٹ میں قلت پیدا ہو گئی ہے۔
ہول سیل اور ریٹیل مارکیٹ میں قیمت 200 روپے فی کلو تک پہنچ چکی ہے۔ ہول سیلرز کا کہنا ہے کہ جب تک چینی کی فراہمی بحال نہیں ہوتی، قیمت میں استحکام ممکن نہیں۔