معروف اداکارہ و ماڈل حمیرا اصغر کی ڈیفنس کے ایک فلیٹ سے ایک ماہ پرانی لاش کی برآمدگی نے شوبز انڈسٹری کو گہرے صدمے سے دوچار کر دیا ہے۔
ساتھی فنکاروں اور انڈسٹری سے جڑے افراد کی جانب سے افسوس اور دکھ کے شدید جذبات کا اظہار کیا جا رہا ہے جبکہ اس واقعے نے ایک بار پھر فنکاروں کی ذہنی صحت سے جڑے مسائل کو نمایاں کر دیا ہے۔
اداکارہ امر خان نے سوشل میڈیا پر ایک جذباتی پیغام میں حمیرا کی موت کو دل دہلا دینے والا قرار دیا اور کہا کہ یہ حادثہ ہمیں یاد دلاتا ہے کہ شوبز انڈسٹری میں دباؤ اور ذہنی تناؤ کس حد تک جان لیوا ہو سکتا ہے۔
انہوں نے کہا کہ فنکاروں کو اپنی ذہنی صحت کو سنجیدگی سے لینا چاہیے، خود پر رحم کریں اور جب ضرورت ہو تو مدد لینے سے نہ ہچکچائیں۔
دوسری جانب اداکارہ ماورا حسین نے بھی اس المناک واقعے پر گہرے دکھ کا اظہار کرتے ہوئے کہا کہ اگر آپ کسی دباؤ یا مسئلے سے گزر رہے ہیں تو براہ کرم بات کریں، میں سننے اور سمجھنے کے لیے ہمیشہ موجود ہوں، ہمیں اب بغیر کسی فیصلے یا ججمنٹ کے ایک دوسرے کا سہارا بننا ہوگا۔
ان بیانات سے یہ واضح ہوتا ہے کہ انڈسٹری میں ذہنی صحت پر گفتگو کی فوری اور سنجیدہ ضرورت ہے، تاکہ ایسے واقعات کی روک تھام ممکن ہو سکے۔
یاد رہے کہ کچھ روز قبل سینئر اداکارہ عائشہ خان کی دو ہفتے پرانی لاش ان کے فلیٹ سے برآمد ہوئی تھی، جس نے انڈسٹری میں تشویش کی ایک اور لہر دوڑا دی تھی۔
فنکار برادری، ماہرین اور مداحوں کا مطالبہ ہے کہ شوبز انڈسٹری میں نہ صرف ذہنی دباؤ کے حوالے سے آگاہی بڑھائی جائے بلکہ فنکاروں کے لیے سپورٹ سسٹمز بھی قائم کیے جائیں تاکہ کوئی اور زندگی یوں خاموشی سے نہ بجھ جائے۔