سابق افغان فوج کا دہشت گرد گرفتار: 'جعلی جہاد کے نام پر پاکستان میں کارروائیاں کیں'

پاکستان کی سیکیورٹی فورسز نے ایک اہم آپریشن کے دوران افغان صوبے چمکنی سے تعلق رکھنے والے ایک غیر ملکی دہشت گرد حکمت اللہ کو گرفتار کر لیا ہے۔
سی پی او پشاور اور پولیس حکام کے مطابق گرفتار دہشت گرد کا ماضی میں افغان نیشنل آرمی (اے این اے) سے تعلق رہا ہے اور اس کی گرفتاری سے پاکستان کے خلاف افغان سرزمین کے استعمال اور دہشت گردانہ نیٹ ورکس سے متعلق اہم انکشافات سامنے آئے ہیں۔
ایڈیشنل آئی جی سی ٹی ڈی عباس احسن نے پشاور میں پریس کانفرنس کرتے ہوئے بتایا کہ گرفتار خارجی حکمت اللہ سے دورانِ تفتیش انتہائی اہم اور حساس معلومات حاصل ہوئی ہیں۔
تفتیشی حکام کا کہنا ہے کہ ملزم نہ صرف افغان نیشنل آرمی کا حصہ رہا ہے بلکہ وہ درس و تدریس سے بھی وابستہ رہا ہے۔

سیکیورٹی فورسز کی اس مؤثر کارروائی کو صوبے میں دہشت گردی کے خلاف جاری مہم کے دوران ایک بڑی اور نمایاں کامیابی قرار دیا جا رہا ہے۔
اس موقع پر نگراں صوبائی وزیر محمود خان نے اپنے ردِعمل میں کہا کہ یہ گرفتاری اس بات کا روشن ثبوت ہے کہ افغان سرزمین مسلسل پاکستان کے خلاف دہشت گردانہ سرگرمیوں کے لیے استعمال ہو رہی ہے۔
انہوں نے واضح کیا کہ پاکستان متعدد بار افغان حکام کو اس سلسلے میں مصدقہ ثبوت فراہم کر چکا ہے اور تمام شواہد کے ساتھ اپنا موقف اور کیس عالمی برادری کے سامنے بھی پیش کیا جا چکا ہے۔

دورانِ تفتیش گرفتار دہشت گرد حکمت اللہ نے اعتراف جرم کرتے ہوئے بتایا کہ اس نے اردو زبان کی تربیت حاصل کر رکھی تھی اور وہ فکری مغالطے کے باعث غلط راستے پر چل پڑا تھا۔
اپنے بیانیے میں اس کا کہنا تھا کہ وہ جعلی جہاد کے نام پر پاکستان میں مختلف کارروائیوں میں ملوث رہے ہیں، تاہم گرفتاری کے بعد پاکستان کی سیکیورٹی فورسز نے اس کے ساتھ انتہائی ذمہ دارانہ اور مناسب سلوک کیا ہے۔
حکام کے مطابق ملزم سے حاصل ہونے والے انکشافات کی روشنی میں مزید تحقیقات اور کارروائیاں جاری ہیں۔