سہ ملکی سیریز کے چوتھے میچ میں انگلینڈ نے پاکستان کو جیت کے لیے 242 رنز کا ہدف دے دیا ہے۔
اتوار کے روز لاہور کے قذافی اسٹیڈیم میں کھیلے جارہے سہ ملکی ون ڈے سیریز کے چوتھے میچ میں پاکستان کی دعوت پر پہلے بیٹنگ کرتے ہوئے انگلینڈ کی ٹیم 47 ویں اوورز میں 241 رنز بناکر آؤٹ ہوگئی۔
میچ کا ٹاس
پاکستان اور انگلینڈ کی ٹیمیں سہ ملکی سیریز کے چوتھے میں لاہور کے قذافی اسٹیڈیم میں مد مقابل ہیں، جہاں دونوں ٹیمیں قذافی اسٹیڈیم میں 21 سال بعد ون ڈے میچ کھیل رہی ہیں۔
اس موقع پر پاکستان ٹیم کے کپتان شاہین شاہ آفریدی نے ٹاس جیت کر پہلے انگلش ٹیم کو بیٹنگ کی دعوت دی۔ ٹاس جیتنے کے بعد گفتگو کرتے ہوئے قومی ٹیم کے کپتان شاہین آفریدی نے کہا کہ وکٹ کو دیکھ کر ٹیم میں ایک اسپینر شامل کیا ہے، انگلینڈ کے خلاف آج کے میچ میں پاکستان ٹیم میں2 تبدیلیاں کی گئی ہیں، نسیم شاہ اور فہیم اشرف کو ڈراپ کرکے رضا اللہ اور شاداب خان کو قومی کرکٹ ٹیم میں شامل کیا گیا ہے، رضا اللہ نے ون ڈے کرکٹ میں اپنا ڈیبیو کیا ہے۔
دوسری جانب انگلینڈ کرکٹ ٹیم کے کپتان ہیری بروک نے کہا کہ ٹاس جیتنے پر ہم بھی بیٹنگ کرتے، انگلینڈ نے اپنی ٹیم میں ایک تبدیلی کی ہے، جوش ٹونگ باہر ہوگئے ان کی جگہ ہنری کروکومب نے اپنا ڈیبیو کیا ہے جب کہ عادل رشید بدستور ٹیم سے باہر ہیں۔
لاہور کے قذافی اسٹیڈیم میں کھیلے جارہے اس میچ میں کامیابی قومی ٹیم کو سیریز کے فائنل میں پہنچا دے گی، جبکہ فاسٹ بولر شاہین شاہ آفریدی کے پاس ون ڈے انٹرنیشنل کرکٹ میں 150 وکٹیں مکمل کرنے والے تیز ترین پاکستانی فاسٹ بولر بننے کا موقع بھی موجود ہے۔
قومی ٹیم کے کپتان شاہین شاہ آفریدی نے ٹاس جیتنے کے بعد گفتگو میں کہا کہ پاکستان کی پلیئنگ الیون میں دو تبدیلیاں کی گئی ہیں۔ فہیم اشرف کی جگہ شاداب خان کو ٹیم میں شامل کیا گیا ہے، جبکہ نسیم شاہ کی جگہ رضا اللہ ون ڈے انٹرنیشنل کرکٹ میں ڈیبیو کریں گے۔
پاکستان نے سہ ملکی سیریز کے ابتدائی دونوں میچز میں کامیابی حاصل کی تھی۔ قومی ٹیم آج انگلینڈ کو شکست دے کر مسلسل تیسری فتح حاصل کرنے اور فائنل میں جگہ پکی کرنے کی کوشش کرے گی۔
بریسٹ کینسر سے آگاہی مہم کے سلسلے میں قومی ٹیم کے کھلاڑی آج کے میچ میں گلابی کٹ پہن کر میدان میں اترے ہیں۔ اس اقدام کا مقصد چھاتی کے سرطان کے بارے میں آگاہی پھیلانا اور اس مرض کی بروقت تشخیص کی اہمیت اجاگر کرنا ہے۔
دوسری جانب قومی ٹیم کے فاسٹ بولر شاہین شاہ آفریدی کے پاس بھی اہم سنگ میل عبور کرنے کا موقع ہے۔ شاہین آفریدی اب تک 79 ون ڈے انٹرنیشنل میچز میں 149 وکٹیں حاصل کر چکے ہیں اور انہیں 150 وکٹیں مکمل کرنے کے لیے صرف ایک وکٹ درکار ہے۔
اگر شاہین آفریدی آج ایک وکٹ حاصل کر لیتے ہیں تو وہ ون ڈے انٹرنیشنل کرکٹ میں تیز ترین 150 وکٹیں مکمل کرنے والے پاکستانی فاسٹ بولر بن جائیں گے۔ اس سے قبل وقار یونس اور شعیب اختر نے 91، 91 میچز میں 150 ون ڈے وکٹیں حاصل کی تھیں، جبکہ ثقلین مشتاق نے 78 میچز میں یہ سنگ میل عبور کیا تھا۔
شاہین شاہ آفریدی کی قذافی اسٹیڈیم میں کارکردگی بھی قابل ذکر رہی ہے۔ وہ یہاں 6 میچز کھیل کر 16 وکٹیں حاصل کر چکے ہیں۔ ان کی قیادت میں پاکستان نے 13 ون ڈے انٹرنیشنل میچز کھیلے ہیں، جن میں سے 9 میں قومی ٹیم کامیاب رہی۔
پاکستان اور انگلینڈ کی ٹیمیں قذافی اسٹیڈیم میں 21 سال بعد ون ڈے انٹرنیشنل میچ میں آمنے سامنے ہیں۔ دونوں ٹیموں کے درمیان اس میدان پر آخری ون ڈے میچ 12 دسمبر 2005 کو کھیلا گیا تھا، جس میں پاکستان نے انگلینڈ کو 7 وکٹوں سے شکست دی تھی۔
آج کے میچ میں قومی ٹیم کی توجہ انگلینڈ کو شکست دے کر فائنل میں جگہ بنانے اور سیریز میں مسلسل تیسری کامیابی حاصل کرنے پر ہوگی، جبکہ شائقین کرکٹ کی نظریں شاہین شاہ آفریدی کے ممکنہ تاریخی سنگ میل پر بھی مرکوز رہیں گی۔