امریکی صدر ڈونلڈ ٹرمپ نے بدھ کے روز کابینہ کا اہم اجلاس طلب کرلیا ہے جس میں کابینہ کے تمام ارکان کی شرکت متوقع ہے۔ یہ پیش رفت ایسے وقت میں سامنے آئی ہے جب ایران پر نئے امریکی حملوں کے بعد ممکنہ امن معاہدے سے متعلق خدشات بڑھتے جارہے ہیں اور واشنگٹن اپنی آئندہ حکمت عملی پر بھی غور کر رہا ہے۔
امریکی میڈیا کے مطابق صدر ڈونلڈ ٹرمپ نے بدھ کو کیمپ ڈیوڈ میں کابینہ کا ایک اہم اجلاس طلب کیا ہے، جسے ایران کے ساتھ جاری مذاکرات کے حوالے سے انتہائی اہم قرار دیا جا رہا ہے۔
رپورٹ کے مطابق اجلاس میں کابینہ کے تمام ارکان شریک ہوں گے، جن میں سبکدوش ہونے والی ڈائریکٹر آف نیشنل انٹیلی جنس تلسی گیبارڈ بھی شامل ہیں۔
یہ اجلاس ایسے وقت میں طلب کیا گیا ہے جب امریکا اور ایران کے درمیان مذاکرات نازک اور فیصلہ کُن مرحلے میں داخل ہو چکے ہیں۔ امریکی انتظامیہ تہران کے ساتھ ایک وسیع تر معاہدے کے امکانات اور خطے میں کمزور پڑتی جنگ بندی کی صورت حال کا جائزہ لے رہی ہے۔