انسانی ارتقا سے متعلق ایک اہم سائنسی تحقیق نے روایتی نظریے کو چیلنج کر دیا ہے۔ ماہرین کے مطابق جدید انسان صرف ایک ہی آبائی گروہ سے پیدا نہیں ہوئے بلکہ افریقا میں پھیلی مختلف انسانی آبادیوں کے طویل باہمی تعلق اور اختلاط کے نتیجے میں وجود میں آئے۔
بین الاقوامی سائنسی جریدے’’نیچر‘‘ میں 2023 میں شائع ہونے والی ایک تحقیق میں انسانی ارتقا کے بارے میں ایک نیا ماڈل پیش کیا گیا ہے، جس کے مطابق انسانوں کی ابتدا ایک سادہ خاندانی درخت کی بجائے ایک پیچیدہ نیٹ ورک کی صورت میں ہوئی۔
اس تحقیق میں موجودہ افریقی آبادیوں کے جینیاتی ڈیٹا کو ابتدائی ’ہومو سیپینز‘ کے فوسل شواہد کے ساتھ ملا کر تجزیہ کیا گیا۔ نتائج سے ظاہر ہوا کہ ابتدائی انسان افریقہ کے مختلف حصوں میں پھیلے ہوئے تھے اور طویل عرصے تک آپس میں جینیاتی تبادلہ کرتے رہے۔
ماہرین اس بات پر متفق ہیں کہ جدید انسانوں کی ابتدا افریقا میں ہوئی، تاہم یہ سوال اب بھی اہم ہے کہ یہ ابتدائی انسانی گروہ کس طرح بٹے، نقل مکانی کی اور دوبارہ آپس میں ملے۔
تحقیق کی مرکزی مصنفہ برینا ہین کے مطابق اس حوالے سے غیر یقینی کی بڑی وجہ فوسلز اور قدیم ڈی این اے کے محدود شواہد ہیں۔ انہوں نے کہا کہ نئی تحقیق انسانی ارتقا کے تصور کو نمایاں طور پر تبدیل کرتی ہے۔
یہ تحقیق سائمن بجری کی سربراہی میں کی گئی، جس میں افریقا کے جنوبی، مشرقی اور مغربی علاقوں کے جینیاتی نمونوں کا تجزیہ شامل تھا۔
تحقیق کا ایک اہم حصہ جنوبی افریقہ کے مقامی قبیلے’’ ناما‘‘ کے 44 نئے جینومز کا تجزیہ تھا، جو جینیاتی تنوع کے حوالے سے نمایاں حیثیت رکھتے ہیں۔
ماہرین کے مطابق ابتدائی انسانی آبادیوں میں نمایاں تقسیم تقریباً 1 لاکھ 20 ہزار سے 1 لاکھ 35 ہزار سال پہلے ہوئی، تاہم اس سے قبل مختلف انسانی گروہ لاکھوں سال تک ایک دوسرے کے ساتھ جینیاتی تبادلہ کرتے رہے۔
تحقیق میں اس ماڈل کو ’’کمزور ساختی بنیاد‘‘ قرار دیا گیا ہے، جس کا مطلب ہے کہ انسانوں کی ابتدا کسی ایک الگ تھلگ آبادی سے نہیں بلکہ باہم جڑی ہوئی متعدد آبادیوں سے ہوئی۔
سائنسدانوں کے مطابق یہ ماڈل انسانی جینیاتی تنوع کو بہتر انداز میں بیان کرتا ہے اور اس کے لیے کسی نامعلوم قدیم انسانی نسل کی شمولیت فرض کرنے کی ضرورت نہیں رہتی۔
تحقیق کے شریک مصنف ٹم ویور کا کہنا ہے کہ یہ نتائج پرانے نظریات کو نئے انداز سے دیکھنے کی ضرورت پر زور دیتے ہیں۔
ماہرین کے مطابق موجودہ انسانوں کے درمیان جینیاتی فرق کا صرف 1 سے 4 فیصد حصہ ان ابتدائی آبادیوں کے فرق سے جڑا ہے، جبکہ باقی مماثلت اس بات کی نشاندہی کرتی ہے کہ یہ گروہ ایک دوسرے کے ساتھ مسلسل رابطے میں رہے۔
مزید برآں، بعد کی تحقیقات نے بھی اس بات کی تصدیق کی ہے کہ افریقہ میں جینیاتی تنوع انسانی ارتقا کو سمجھنے کے لیے انتہائی اہم ہے، جہاں ہزاروں سال پر محیط انسانی تاریخ کے شواہد ملے ہیں۔
ماہرین کا کہنا ہے کہ مجموعی طور پر یہ تحقیق اس بات کو واضح کرتی ہے کہ انسانوں کی ابتدا کسی ایک مقام یا ایک ہی لمحے کا نتیجہ نہیں تھی، بلکہ یہ ایک طویل عمل تھا جس میں مختلف آبادیوں کے درمیان مسلسل میل جول اور ارتقائی تبدیلیاں شامل تھیں۔