پی ڈی ایم کا سر اپوزیشن میں ہے اور دھڑ حکومت کررہا ہے، مولانا فضل الرحمان کا دلچسپ تبصرہ

جمعیت علمائے اسلام (ف) کے سربراہ مولانا فضل الرحمان نے جے یو آئی اور پی ٹی آئی کے درمیان تحریک پر اتفاق نہ ہونے پر دلچسپ تبصرہ کرتے ہوئے کہا ہے کہ پی ڈی ایم کا سر اپوزیشن میں ہے اور دھڑ حکومت کررہا ہے، تحاریک میں باہمی مشاورت کی ضرورت ہوتی ہے، خیبرپختونخوا میں کوئی حکومت نہیں، صوبائی حکمران مسلح گروپوں کو بھتے دے رہے ہیں۔
آج نیوز کے پروگرام ”روبرو“ میں جمعیت علمائے اسلام (جے یو آئی) اور پاکستان تحریک انصاف (پی ٹی آئی) کے درمیان تحریک پر اتفاق نہ ہونے پر سربراہ جے یو آئی (ف) مولانا فضل الرحمان نے دلچسپ تبصرہ کرتے ہوئے کہا کہ پی ڈی ایم کا سر اپوزیشن میں ہے اور دھڑ حکومت کررہا ہے۔
مولانا فضل الرحمان نے کہا کہ تحاریک میں باہمی مشاورت کی ضرورت ہوتی ہے، سب مل کر تحریک چلاتے ہیں تو زیادہ کامیاب ہوتی ہے، اتحاد ہمیشہ ضرورت کے تحت بنتے ہیں۔
اپنے انٹرویو میں سربراہ جے یو آئی (ف) نے کہا کہ محسن نقوی مجھ سے بطور برخوردار ملنے آتے ہیں، محسن نقوی شخصی تعلق کی بنا پر ملتے ہیں، میرے لیے محسن نقوی کی حیثیت صرف برخوردار کی ہے۔
انہوں نے مزید کہا کہ پاکستان میں رابطے رکھنا معمول کی بات ہے، پی ٹی آئی اسٹیبلشمنٹ سے مذاکرات کی بات کرتی ہے، پی ٹی آئی کبھی اسٹیبلشمنٹ سے مذاکرات سے انکار کرتی ہے، اپوزیشن جماعتیں آپس میں مل کر چلتی ہیں، موجودہ اپوزیشن میں مل کر چلنے کی بھی کمی ہے، اتحاد ہمیشہ ضرورت کے تحت ہوتا ہے۔
مولانا فضل الرحمان کا کہنا تھا کہ پی ٹی آئی سے اختلاف تو ہوسکتا ہے لیکن تلخی نہیں ہونی چاہیئے، پی ٹی آئی ہمارے تحفظات دور کرے تو ہم ماحول بناتے ہیں، عمران خان جیل میں ہے تو ہم بھی اور نوازشریف بھی تو جیل میں رہے، ایک شخص کی رہائی پارٹی کا بنیادی مقصد قرار دینا سیاسی رویہ نہیں، میں عمران خان کی رہائی کے حق میں ہوں۔
سربراہ جے یو آئی (ف) نے کہا کہ خیبرپختونخوا میں کوئی حکومت نہیں ہے، صوبائی حکمران مسلح گروپوں کو بھتے دے رہے ہیں، خیبرپختونخوا میں کرپشن کی شرح عروج پر ہے، میں حکومت کی تبدیلی کا کہنے کا حق رکھتا ہوں، ایسی صورتحال میں تبدیلی کا مطالبہ ہر کسی کا حق ہے، ایک شخص اپنے آپ کو افلاطون سمجھتا ہے۔
پاکستان کو اسلامی جمہوری ریاست بنانے کی جدوجہد جاری رکھیں گے، فضل الرحمان
راولپنڈی میں شمولیتی پروگرام کی تقریب سے خطاب کرتے ہوئے جے یوآئی (ف) کے سربراہ مولانا فضل الرحمان نے کہا ہے کہ پاکستان کو اسلامی جمہوری ریاست بنانے کی جدوجہد جاری رکھیں گے، ہم نے آئین کو اسلامی بنانے کے لیے ہرفورم پرآوازبلند کی، یہ وطن اسلام کے نام پر حاصل کیا، اس کی نظریاتی بنیادوں پر سمجھوتہ نہیں ہوگا، پاکستان میں مخصوص لابی مذہبی اقدار کو کمزور کرنا چاہتی ہے۔
مولانا فضل الرحمان نے کہا کہ ہم پاکستان میں آئین و قانون کی بالادستی چاہتے ہیں، ختم نبوت کے معاملے پر سپریم کورٹ کو مؤقف بدلنے پر مجبور کیا، دنیا بھر میں مذہب کی توہین کی جا رہی ہے، اس پر عالمی ضمیر کو جھنجھوڑنے کی ضرورت ہے ۔
انہوں نے مزید کہا کہ مہنگائی نے عوام کا جینا محال کردیا ہے، معیشت کا دھڑن تختہ ہو چکا، ہمسایہ ممالک ترقی کر رہے ہیں، پاکستان معاشی بحران میں ڈوبا ہوا ہے، عام آدمی کی زندگی میں تبدیلی لائے بغیر بہتری ممکن نہیں۔
مولانا فضل الرحمان کا کہنا تھا کہ فرخ کھوکھر کی جے یو آئی میں شمولیت خوش آئند ہے، ان کی شمولیت سے جماعت کا قافلہ مزید مضبوط ہوگا اور دین اسلام کے فروغ میں تقویت ملے گی۔