بشریٰ بی بی کے بیٹے موسیٰ مانیکا کی فائرنگ سے ملازم زخمی، پولیس نے گرفتار کرلیا

پاکپتن کے نواحی گاؤں پیر غنی میں سابقہ خاتون اول بشریٰ بی بی کے بیٹے موسیٰ مانیکا کی جانب سے مبینہ فائرنگ کا واقعہ پیش آیا، جس میں ایک ملازم زخمی ہوگیا۔ پولیس کے مطابق موسیٰ مانیکا نے تکرار کے دوران طیش میں آکر فائرنگ کی، جس سے 17 سالہ علی بہادر زخمی ہو گیا۔
زخمی نوجوان کو فوری طور پر ڈسٹرکٹ اسپتال منتقل کیا گیا جہاں اس کی حالت خطرے سے باہر بتائی جا رہی ہے۔ واقعہ خاور مانیکا کے ڈیرے پر پیش آیا۔ اطلاع ملتے ہی تھانہ صدر پولیس نے کارروائی کرتے ہوئے موسیٰ مانیکا کو ڈیرے سے گرفتار کر لیا۔
پولیس حکام کے مطابق فائرنگ کے واقعے کی تفتیش کا آغاز کر دیا گیا ہے، اور موسیٰ مانیکا سے پوچھ گچھ جاری ہے۔