کوئٹہ: ہزار گنجی میں موٹرسائیکل بم دھماکا، 3 خواتین زخمی

کوئٹہ کے علاقے ہزار گنجی میں مری کیمپ کے قریب موٹرسائیکل میں نصب ریموٹ کنٹرول بم کا زور دار دھماکا ہوا، جس کے نتیجے میں 3 راہگیر خواتین زخمی ہوگئیں۔
پولیس کے مطابق دھماکے میں ایک سے ڈیڑھ کلو گرام تک دھماکا خیز مواد استعمال کیا گیا، اور اسے ریموٹ کنٹرول ڈیوائس کے ذریعے اڑایا گیا۔
دھماکے کے بعد سیکیورٹی فورسز اور پولیس کی بھاری نفری نے موقع پر پہنچ کر علاقے کو گھیرے میں لے لیا، اور شواہد اکٹھے کرنے کا عمل شروع کر دیا گیا ہے۔
بم ڈسپوزل اسکواڈ نے موقع پر سرچ آپریشن شروع کر دیا ہے جبکہ کاؤنٹر ٹیررازم ڈیپارٹمنٹ (سی ٹی ڈی) کے حکام بھی جائے وقوعہ پر موجود ہیں اور مزید تحقیقات جاری ہیں۔
ابتدائی اطلاعات کے مطابق دھماکے کا ہدف واضح نہیں ہو سکا، تاہم قانون نافذ کرنے والے ادارے تمام پہلوؤں سے واقعے کی جانچ کر رہے ہیں۔