الیکشن کمیشن کا امتیازی رویہ، چیف جسٹس سے پی ٹی آئی کیسز میں انصاف کا مطالبہ — بیرسٹر گوہر

بیرسٹر گوہر نے پارلیمانی پارٹی اجلاس کے بعد گفتگو کرتے ہوئے کہا کہ الیکشن کمیشن کا رویہ امتیازی ہے، چیف جسٹس سے مطالبہ ہے پی ٹی آئی کے خلاف کیسسز پر ایکشن لیں۔ انھوں نے بانی پی ٹی آئی تک رسائی اورناروا سلوک بند کرنے کا بھی مطالبہ کیا۔ پاکستان تحریک انصاف کی پارلیمانی پارٹی کے اجلاس کا اعلامیہ جاری کردیا گیا۔
اسلام آباد میں پاکستان تحریک انصاف کی پارلیمانی پارٹی کا اہم اجلاس اسلام آباد میں منعقد ہوا، جو تقریباً چار گھنٹے تک جاری رہا۔ اجلاس میں پارٹی کے آئندہ لائحہ عمل سمیت آئینی، قانونی اور سیاسی امور پر تفصیلی غور و خوض کیا گیا۔
اسلام آباد میں پی ٹی آئی کے پارلیمانی اجلاس کے بعد میڈیا سے گفتگو کرتے ہوئے چیئرمین پی ٹی آئی بیرسٹر گوہر علی خان نے کہا کہ آج کے اجلاس میں بانی تحریک انصاف کے ساتھ غیر انسانی اور امتیازی سلوک کی شدید مذمت کی گئی۔ انہوں نے بتایا کہ جمشید دستی اور عمر ایوب کے خلاف اقدامات کا بھی جائزہ لیا گیا، جبکہ الیکشن کمیشن کے رویے کو جانب دار اور امتیازی قرار دیا گیا۔
بیرسٹر گوہر کا کہنا تھا کہ پی ٹی آئی کی احتجاجی تحریک 5 اگست کو نقطۂ عروج پر ہوگی اور ارکان پارلیمنٹ ہر جگہ بانی پی ٹی آئی کی کال پر لبیک کہیں گے۔ انہوں نے چیف جسٹس آف پاکستان سے مطالبہ کیا کہ پارٹی قائدین اور کارکنوں کے خلاف مقدمات میں منصفانہ اور غیر جانب دارانہ رویہ اپنایا جائے۔
پاکستان تحریک انصاف کی پارلیمانی پارٹی کے اجلاس کا اعلامیہ جاری
اعلامیے کے مطابق پاکستان تحریک انصاف کی پارلیمانی پارٹی کے اجلاس میں فیصلہ کیا گیا کہ پارٹی کسی سیاسی، عدالتی یا انتظامی زیادتی کے آگے نہ جھکی ہے نہ جھکے گی، اور عوامی حقوق کے لیے جدوجہد جاری رکھے گی۔ اجلاس میں بانی چیئرمین اور ان کی اہلیہ بشریٰ بی بی کے ساتھ اڈیالہ جیل میں ناروا سلوک کی شدید مذمت کی گئی اور بنیادی حقوق کی خلاف ورزیوں پر فوری ایکشن کا مطالبہ کیا گیا۔
اجلاس میں الیکشن کمیشن کے جمشید دستی کو نااہل قرار دینے کے فیصلے کو مسترد کیا گیا اور اسے مسلم لیگ ن کے لیے سہولت کاری قرار دیا گیا۔ فیصل آباد میں کارکنوں کے خلاف مقدمات اور اپوزیشن لیڈر عمر ایوب کے خلاف کیس کو سیاسی انتقام قرار دے کر مذمت کی گئی، اور عمر ایوب کے ساتھ مکمل یکجہتی کا اعلان کیا گیا۔
پارلیمانی پارٹی نے ملک میں مہنگائی، پٹرول و چینی کی قیمتوں میں اضافے اور چینی درآمد جیسے حکومتی فیصلوں پر شدید تشویش کا اظہار کیا۔ اجلاس میں بلوچستان کے ضلع قلات میں دہشتگردی کے واقعے کی مذمت کرتے ہوئے حکومت سے سیکیورٹی اقدامات کا مطالبہ کیا گیا۔ پی ٹی آئی نے تحریک کے تسلسل اور عوامی رابطہ مہم تیز کرنے کا بھی فیصلہ کیا۔