فیڈریشن آف پاکستان چیمبرز آف کامرس اینڈ انڈسٹری اور مختلف چیمبر آف کامرس اینڈ انڈسٹری نے 19 جولائی کو ملک گیر ہڑتال کے حوالے سے اختلافات سامنے آگئے۔
صدر ایف پی سی سی آئی عاطف اکرام شیخ نے 19 جولائی کی ہڑتال سے علیحدگی کا اعلان کرتے ہوئے کہا ہے کہ فیڈریشن اس احتجاج کا حصہ نہیں بنے گی، جب کہ کراچی چیمبر آف کامرس کے صدر جاوید بلوانی نے ہڑتال کے فیصلے پر قائم رہنے کا اعلان کیا ہے۔
عاطف اکرام کے مطابق وزیر خزانہ سے ہونے والی حالیہ ملاقات میں حکومت نے تاجروں کو ان کے مطالبات تسلیم کرنے کی یقین دہانی کرائی ہے، جس کے بعد احتجاج کا جواز باقی نہیں رہا۔
کراچی: تاجر برادری کا 19 جولائی کو ملک گیر ہڑتال کا اعلان
ان کا کہنا تھا کہ تمام چیمبرز نے ملاقات میں ہڑتال نہ کرنے کی یقین دہانی کرائی تھی اور مذاکرات اب بھی جاری ہیں۔
انہوں نے مزید کہا کہ آج وزارت خزانہ کی جانب سے پریس ریلیز جاری کی جائے گی تاکہ مذاکرات کی پیش رفت کو سرکاری سطح پر تسلیم کیا جا سکے، تاہم انہوں نے گزشتہ روز ریلیز جاری نہ کرنے پر حکومت سے ناراضی کا اظہار بھی کیا۔
لاہور کے تاجروں کا ایف بی آر قوانین کیخلاف 19 جولائی کو ہڑتال کی حمایت کا اعلان
دوسری جانب کراچی چیمبر آف کامرس کے صدر جاوید بلوانی نے 19 جولائی کو ملک گیر ہڑتال اور شٹر ڈاؤن کی تصدیق کرتے ہوئے کہا ہے کہ تاجر برادری ٹیکسوں اور معاشی پالیسیوں کے خلاف اپنے تحفظات پر متحد ہے۔
ان کے مطابق ملک بھر کے ٹرانسپورٹرز نے بھی اسی روز پہیہ جام ہڑتال کا اعلان کر رکھا ہے۔
تاجروں کے درمیان اس اختلاف کے باعث 19 جولائی کی ہڑتال کے اثرات پر سوالات اٹھنے لگے ہیں۔ دیکھنا یہ ہے کہ تاجروں کی یہ تقسیم احتجاج کی شدت پر کس حد تک اثرانداز ہوگی۔