وزیراعظم سے ترک وزرائے خارجہ اور دفاع کی ملاقات، مختلف شعبوں میں تعاون مزید مضبوط بنانے کے عزم کا اعادہ

وزیراعظم شہبازشریف سے ترک وزیرخارجہ اور وزیردفاع نے ملاقات کی، ملاقات میں فیلڈ مارشل عاصم منیر اور نائب وزیراعظم اسحاق ڈاربھی موجود تھے، وزیراعظم نے پاک ترکیہ تعلقات کا خیرمقدم کیا۔ وزیراعظم نے ترک کمپنیوں کو پاکستان میں سرمایہ کاری کا دائرہ بڑھانے کی دعوت دی اور مختلف شعبوں میں تعاون مزید مضبوط بنانے کیئے غیر متزلزل عزم کا اعادہ کیا۔
وزیراعظم شہباز شریف سے ترکیہ کے وزیرخارجہ ہاکان فیدان اورقومی دفاع کے وزیر یاسر گلر نے ملاقات کی، وزیراعظم نے دوطرفہ تعلقات کے مثبت پیشرفت پر اطمینان کا اظہار کیا اور تجارت، سرمایہ کاری، ٹیکنالوجی اور دفاع سمیت مختلف شعبوں میں ترکیہ کے ساتھ تعاون کو مزید مضبوط بنانے کے لیے پاکستان کے غیر متزلزل عزم کا اعادہ کیا۔
ملاقات کے دوران فیلڈ مارشل سید عاصم منیر، نائب وزیراعظم اسحاق ڈار، وزیر دفاع خواجہ آصف اور قومی سلامتی کے مشیر لیفٹیننٹ جنرل محمد عاصم ملک سمیت دیگر اعلٰی حکام بھی شریک تھے۔
ترک وزیرخارجہ اور وزیردفاع کی نائب وزیراعظم اسحاق ڈار سے ملاقات
وزیراعظم شہباز شریف نے پاکستان اور ترکیہ کے دیرینہ اور مضبوط تعلقات کا خیرمقدم کرتے ہوئے کہا کہ دونوں ممالک کے روابط مشترکہ تاریخ، ثقافت اور باہمی احترام پر مبنی ہیں۔ انہوں نے دوطرفہ تعاون کو مزید فروغ دینے کی ضرورت پر زور دیا۔
ترک وزیر دفاع کا ایئر ہیڈکوارٹر اسلام آباد کا دورہ، پاک فضائیہ کی قیادت سے اہم ملاقات
وزیراعظم نے رواں سال ترکیہ کے صدر رجب طیب ایردوان کے ساتھ ہوئی اپنی مختلف ملاقاتوں کا ذکر کرتے ہوئے پاک – ترکیہ تعلقات کو اسٹریٹجک شراکت داری میں تبدیل کرنے کے پاکستان کے پختہ عزم کا اعادہ کیا۔ وزیراعظم نے اس عزم کا اعادہ بھی کیا کہ پاکستان ترکیہ کے ساتھ دفاع، تجارت، سرمایہ کاری اور دیگر شعبوں میں تعاون کو مزید وسعت دینا چاہتا ہے۔
ملاقات کے دوارن وزیراعظم شہباز شریف نے تیزی سے بدلتے ہوئے علاقائی اور عالمی ماحول بالخصوص غزہ اور ایران کے تناظر میں دونوں فریقوں کے درمیان قریبی روابط کی ضرورت پر بھی زور دیا۔