آئی پی ایل 2025 کے دلچسپ مقابلوں میں ہفتے کے روز لکھنؤ سپر جائنٹس اور سن رائزرز حیدرآباد نے شاندار کارکردگی کا مظاہرہ کیا۔ جہاں ایک جانب ابھیشیک شرما نے سن رائزرز کی طرف سے 141 رنز کی دھواں دار اننگز کھیل کر ریکارڈ قائم کیا، وہیں لکھنؤ کے نکولس پوران نے بھی شائقین کو اپنے چھکوں سے محظوظ کیا — یہاں تک کہ ایک مداح زخمی بھی ہوگیا۔
لکھنؤ کے ایکنا اسٹیڈیم میں کھیلے گئے میچ میں نکولس پوران نے صرف 34 گیندوں پر 61 رنز کی برق رفتار اننگز کھیلی، جس میں سات بلند و بالا چھکے شامل تھے۔ انہی میں سے ایک چھکا اسٹینڈ میں بیٹھے ایک مداح کے سر پر لگا، جس سے اسے چوٹ آئی اور خون بہنے لگا۔ مداح کو فوری طور پر اسپتال منتقل کیا گیا۔ خوش قسمتی سے ابتدائی علاج کے بعد وہ دوبارہ اسٹیڈیم واپس آیا اور لکھنؤ کی جیت کا بھرپور جشن منایا۔
پوران کی اس اننگز کی بدولت لکھنؤ نے گجرات ٹائٹنز کا 181 رنز کا ہدف تین گیندیں قبل ہی حاصل کر لیا۔ اس شاندار کارکردگی کے بعد نکولس پوران نے اورنج کیپ پر اپنی گرفت مزید مضبوط کر لی ہے۔ انہوں نے سیزن میں اب تک چھ اننگز میں 215.43 کے اسٹرائیک ریٹ سے 349 رنز بنائے ہیں، جو دوسرے نمبر پر موجود سائی سدرشن سے 20 رنز زیادہ ہیں۔
دوسری طرف سن رائزرز حیدرآباد نے راجیو گاندھی انٹرنیشنل اسٹیڈیم میں پنجاب کنگز کو آٹھ وکٹوں سے شکست دی۔ ابھیشیک شرما کی ریکارڈ 141 رنز کی اننگز نے سن رائزرز کو آسان فتح دلانے میں اہم کردار ادا کیا۔
لکھنؤ کی یہ اس سیزن میں چوتھی اور مسلسل تیسری جیت ہے، جبکہ گجرات ٹائٹنز کو پانچ میچوں کے بعد پہلی شکست کا سامنا کرنا پڑا۔