سابقہ اداکارہ اور سوشل میڈیا انفلوئنسر صنم چوہدری نے اپنے مداحوں کو خوشخبری سناتے ہوئے کہا ہے کہ اگر حالات اور کردار موزوں ہوئے تو وہ مکمل حجاب کے ساتھ ڈرامہ انڈسٹری میں واپسی پر غور کر سکتی ہیں۔
انسٹاگرام پر سوال و جواب کے ایک سیشن کے دوران ایک مداح نے صنم چوہدری سے کیا کہ کیا آپ حجاب کے ساتھ ڈرامہ انڈسٹری میں واپس آئیں گی؟ جس پر سابقہ اداکارہ نے جواب دیا کہ اگر کوئی ایسا پروجیکٹ ہو جو لوگوں کو اللہ کے قریب لائے اور مجھے اپنی حدود کے اندر کام کرنے دیا جائے، تو واپسی مکمل حجاب کے ساتھ۔ ممکن ہے۔
ان کے اس جواب پر مداحوں کی جانب سے بھرپور پذیرائی دیکھنے میں آئی، ایک صارف نے لکھا کہ ایسی باحجاب واپسی انڈسٹری کے لیے مثبت قدم ہو گی جبکہ ایک اور نے کہا کہ ڈرامہ انڈسٹری میں ایسے بامقصد کرداروں کی ضرورت ہے، صنم کی واپسی خوش آئند ہوگی۔
واضح رہے کہ صنم چوہدری نے کچھ سال قبل شوبز کو خیرباد کہہ کر شادی اور روحانی سفر کو ترجیح دی تھی، انہوں نے گلوکار سومی چوہان سے شادی کی اور اب دو بچوں کی ماں ہیں۔
صنم اس وقت اسلامی تعلیمات حاصل کر رہی ہیں اور انسٹاگرام پر اپنے 2.6 ملین فالورز کے ساتھ قرآن کی آیات اور دینی پیغامات شیئر کرتی رہتی ہیں۔
شوبز سے کنارہ کشی سے قبل صنم چوہدری نے متعدد معروف ڈراموں میں اپنی اداکاری کا لوہا منوایا، ان کی جاندار اداکاری، معصومیت بھرا انداز اور مضبوط اسکرین پریزنس نے انہیں کم وقت میں مقبول اداکاراؤں کی صف میں لاکھڑا کیا تھا۔