پاکستان کی معروف ٹک ٹاک اسٹار اور ڈیجیٹل انفلوئنسر جنت مرزا ایک بار پھر سوشل میڈیا پر خبروں کی زینت بن گئی ہیں۔ اس بار توجہ کا مرکز ان کا حج سفر بنا، جس کی تصاویر اور ویڈیوز انہوں نے اپنے سوشل میڈیا اکاؤنٹس پر شیئر کیں۔
دو روز قبل جنت مرزا اپنے والد، والدہ اور بہن علیشبہ انجم کے ہمراہ حج کی ادائیگی کے لیے روانہ ہوئیں، روانگی کے لمحات اور سفر کے دوران کی جھلکیاں انہوں نے انسٹاگرام اسٹوریز اور پوسٹس کے ذریعے مداحوں کے ساتھ شیئر کیں۔
خاص طور پر ایک ویڈیو جس میں انہوں نے دعویٰ کیا کہ فلائٹ صرف ان کے خاندان کے لیے مخصوص تھی، سوشل میڈیا پر وسیع توجہ حاصل کر گئی۔
ویڈیو وائرل ہونے کے بعد مختلف حلقوں کی جانب سے مخلوط ردعمل دیکھنے میں آیا، کچھ صارفین نے اسے شان و شوکت کا مظاہرہ قرار دیا اور سوال اٹھایا کہ آیا واقعی کسی انفلوئنسر کے لیے پوری فلائٹ بُک کرنا ممکن ہے؟
چند صارفین نے لکھا کہ یہ حج ہے یا شاہی سیر؟ اگر اتنی گنجائش تھی تو غریب حاجیوں کو بھی ساتھ لے جایا جاتا، حج جیسے روحانی سفر میں سادگی کا پہلو زیادہ اہم ہے۔
دوسری جانب کچھ صارفین نے رائے دی کہ ویڈیو ممکنہ طور پر فلائٹ کی ابتدائی سواریاں دکھا رہی ہو اور ہو سکتا ہے کہ مکمل فلائٹ بعد میں پر ہو گئی ہو۔
جنت مرزا کی وضاحت
تنقید کے بعد جنت مرزا نے انسٹاگرام پر وضاحت دی کہ یہ ایک غیر معمولی اتفاق ہو سکتا ہے اور انہوں نے آخری بار اس نوعیت کی خالی فلائٹ COVID-19 کے دوران دیکھی تھی جبکہ انہوں نے واضح طور پر فلائٹ بُکنگ سے متعلق کوئی دعویٰ نہیں کیا۔
واضح رہے کہ سفر کی ویڈیوز سامنے آنے کے بعد سوشل میڈیا پر بعض افراد نے جنت مرزا اور ان کے خاندان کی معاشی حیثیت اور آمدنی کے ذرائع پر بھی سوالات اٹھائے، جس پر کچھ مداحوں نے ان کا دفاع کرتے ہوئے کہا کہ ان کی سوشل میڈیا موجودگی اور برانڈ کولیبوریشنز سے معقول آمدنی ہوتی ہے۔