فیڈرل پبلک سروس کمیشن نے سی ایس ایس-2025 کے حتمی نتائج کا اعلان کر دیا

فیڈرل پبلک سروس کمیشن نے سی ایس ایس مقابلے کے امتحان 2025 کے حتمی نتائج جاری کر دیے ہیں۔ اس امتحان میں 170 امیدوار مختلف سرکاری سروس گروپس کیلئے منتخب ہوئے ہیں۔
فیڈرل پبلک سروس کمیشن نے سی ایس ایس مقابلے کے امتحان 2025 کے حتمی نتائج کا اعلان کر دیا ہے۔ یہ امتحان ملک میں سول سروسز میں شمولیت کے لیے سب سے اہم اور سخت مقابلہ جاتی امتحان سمجھا جاتا ہے، جس میں ہر سال ہزاروں امیدوار حصہ لیتے ہیں۔
اعداد و شمار کے مطابق اس سال 12 ہزار 792 امیدواروں نے تحریری امتحان میں شرکت کی، جن میں سے 355 امیدوار کامیاب قرار پائے جب کہ دستیاب آسامیوں اور قومی کوٹہ نظام کے تحت 170 امیدواروں کو مختلف سرکاری سروس گروپس میں تعینات کیا گیا۔
نتائج میں خواتین امیدواروں کی کارکردگی کو خاص طور پر نمایاں قرار دیا گیا ہے، جنہوں نے مختلف مراحل میں شاندار کارکردگی دکھائی۔ اس کے علاوہ ایک خصوصی طور پر معذور امیدوار نے غیر معمولی کارکردگی کا مظاہرہ کرتے ہوئے مجموعی طور پر دوسری پوزیشن حاصل کی اور پاکستان انتظامی سروس میں تعیناتی حاصل کی۔
فیڈرل پبلک سروس کمیشن نے کامیاب امیدواروں کو مبارک باد دیتے ہوئے امید ظاہر کی ہے کہ وہ دیانت داری، پیشہ ورانہ مہارت اور عوامی خدمت کے اعلیٰ معیار کو برقرار رکھیں گے۔
کمیشن نے ان امیدواروں کی بھی حوصلہ افزائی کی ہے جو امتحان میں کامیاب تو ہوئے لیکن محدود آسامیوں کے باعث تعیناتی حاصل نہ کر سکے۔ بیان میں کہا گیا ہے کہ ان کی کامیابی ان کی محنت اور صلاحیت کا واضح ثبوت ہے اور انہیں مستقبل میں مزید محنت جاری رکھنے کی تلقین کی گئی ہے۔
فیڈرل پبلک سروس کمیشن نے اس عزم کا اعادہ کیا ہے کہ وہ شفافیت، میرٹ اور مساوی مواقع کی پالیسی پر سختی سے عمل جاری رکھے گا تاکہ ملک کیلئے بہترین اور اہل افراد کا انتخاب یقینی بنایا جا سکے۔