امریکی وفاقی تحقیقاتی ادارے (ایف بی آئی) کی ایک سینئر ایجنٹ نے استعفیٰ دے دیا ہے، جب وہ ایک امیگریشن اہلکار کے ہاتھوں 37 سالہ امریکی شہری رینی گڈ کی ہلاکت کے معاملے میں تفتیش کرنے کی کوشش کر رہی تھیں.
خبر رساں ادارے رائٹرز کے مطابق ٹریسی مرگن نامی ایجنٹ ایف بی آئی کے منیاپولس فیلڈ آفس میں ایک سینئر سپروائزر تھیں، جنہوں نے امیگریشن اینڈ کسٹمز انفورسمنٹ آئیس کے اہلکار جواناتھن راس کے خلاف ایک سول رائٹس انکوائری شروع کرنے کی کوشش کی تھی۔ اس انکوائری کا مقصد یہ معلوم کرنا تھا کہ آیا راس نے گڈ کو غیر ضروری طاقت استعمال کرتے ہوئے قتل کیا یا نہیں۔
رینی گڈ، جس کی تین بچے ہیں، اس ماہ کے شروع میں منیاپولس میں اپنے گاڑی میں موجود تھیں جب وفاقی امیگریشن اہلکار نے انہیں گولی مار کر ہلاک کر دیا۔
اس واقعے نے امریکہ میں وسیع بحث اور تنقید پیدا کی، کیونکہ کچھ حکام نے کہا کہ گڈ نے گاڑی سے اہلکار کو نقصان پہنچانے کی کوشش کی، جبکہ دیگر نے اس کا انتہائی طاقت کا استعمال قرار دیا ہے۔
ایف بی آئی کی اعلیٰ قیادت نے مبینہ طور پر مرگن پر دباؤ ڈالا کہ وہ اس مقدمے کو آگے نہ بڑھائیں اور اسے روک دیں، جس کے بعد انہوں نے اپنے عہدے سے استعفیٰ دے دیا۔
امریکی محکمہ انصاف نے بھی اس واقعے کی تفتیش میں ریاستی محکموں کو شراکت کرنے سے روک دیا، جس پر مقامی حکام نے تشویش کا اظہار کیا ہے۔
یہ بھی رپورٹ کیا گیا ہے کہ گڈ کی ہلاکت کے بعد وفاقی سطح پر اور بھی متعدد قانونی اور سیاسی سوالات اٹھ کھڑے ہوئے ہیں۔ کچھ وفاقی و ریاستی وکلاء نے عدالتی عمل اور شواہد کی بنیاد پر مزید تحقیقات کی درخواست کی ہے، جبکہ کچھ وفاقی پراسیکیوٹرز نے بھی اپنے عہدوں سے استعفیٰ دے دیا تھا کیونکہ انہیں معاملے میں مناسب کارروائی نہ ہونے پر اختلاف تھا۔
ابھی تک ایف بی آئی یا امریکی محکمہ انصاف کی جانب سے اس واقعے اور مرگن کے استعفیٰ پر کوئی سرکاری تبصرہ سامنے نہیں آیا۔ اس واقعے نے امریکہ میں وفاقی اور ریاستی سطح پر طاقت کے استعمال، سول حقوق اور امیگریشن پالیسی کے بارے میں جاری بحث کو مزید تقویت دی ہے۔