کراچی: شوبز انڈسٹری سے تعلق رکھنے والی ماڈل اور اداکارہ حمیرا اصغر کی پر اسرار موت اور کئی ماہ بعد ان کی لاش کی برآمدگی نے شوبز حلقوں میں ہلچل مچادی ہے۔
اس افسوسناک واقعے نے نہ صرف انڈسٹری سے جڑے افراد بلکہ تنہا زندگی گزارنے والے دیگر افراد کو بھی گہری تشویش میں مبتلا کر دیا ہے۔
کراچی جیسے مصروف شہر میں ایک اپارٹمنٹ میں اکیلی رہائش پذیر حمیرا کی لاش نو ماہ تک فلیٹ میں پڑی رہی اور کسی کو خبر نہ ہوئی جو کہ ایک سماجی المیے کی عکاسی ہے۔
اس واقعے نے انسانی تعلقات، باہمی رابطے اور پڑوسیوں کے درمیان رابطے کی اہمیت کو دوبارہ اجاگر کردیا ہے۔
اداکاروں کی جانب سے رابطہ مہم کا آغاز
اداکارہ سونیا حسین نے انسٹاگرام پر جاری ایک ویڈیو پیغام میں انکشاف کیا ہے کہ حمیرا اصغر کی تنہائی میں موت کے بعد شوبز انڈسٹری میں ایک واٹس ایپ گروپ تشکیل دیا گیا ہے۔
سونیا حسین نے بتایا کہ اس گروپ کا مقصد انڈسٹری سے جڑی لڑکیوں، میک اپ آرٹسٹس، تکنیکی عملے اور دیگر اکیلے رہنے والے افراد کے درمیان رابطے کا مؤثر نظام قائم کرنا ہے۔
سونیا حسین کے مطابق وہ خود بھی حمیرا کی آخری رسومات کی ذمہ داری لینے کے لیے پولیس سے رابطے میں تھیں لیکن پولیس نے بتایا کہ لاش صرف قریبی رشتہ داروں کے حوالے کی جاسکتی ہے۔ بعد ازاں معلوم ہوا کہ حمیرا کے بھائی اور بہنوئی کراچی آ رہے ہیں۔
سینئر فنکار بھی سرگرم عمل
سونیا حسین کہتی ہیں کہ سینئر اداکارہ روبینہ اشرف نے بھی اس معاملے پر ان سے رابطہ کیا اور اس ضمن میں بھرپور کردار ادا کرنے کا یقین دلایا۔ اس کے علاوہ یاسر حسین اور انڈسٹری کی تنظیم بھی اس سلسلے میں سرگرم ہیں۔
اجتماعی ذمہ داری کا وقت آگیا ہے
سونیا حسین کا کہنا تھا کہ اب وقت آگیا ہے کہ صرف ایک تنظیم پر انحصار نہ کیا جائے بلکہ ہر فرد کو انفرادی طور پر آگے بڑھنا ہوگا۔ ہم سب کو چاہیے کہ اپنے اہل خانہ کے ساتھ ساتھ پڑوسیوں، دوستوں اور ساتھیوں کی بھی خبر گیری کریں۔
ان کا مزید کہنا تھا کہ اگر ہر شخص روزانہ کم از کم پانچ افراد کی خیریت دریافت کرے اور ان کی ضروریات کا پوچھے تو ایسے المناک واقعات کی روک تھام ممکن ہوسکتی ہے۔