مغربی بنگال کے ضلع مرشدآباد میں نئے وقف ایکٹ کے خلاف جمعے کو نماز کے بعد شروع ہونے والے پرتشدد مظاہروں کے نتیجے میں اب تک تین افراد ہلاک اور 138 افراد کو گرفتار کیا جاچکا ہے۔
ہلاک ہونے والوں میں ایک باپ بیٹا، ہرگوبند داس اور چندن داس شامل ہیں جنہیں ہفتے کے روز مشتعل ہجوم نے بے دردی سے قتل کر دیا، جبکہ ایک 17 سالہ نوجوان احتجاج کے دوران پولیس فائرنگ سے جاں بحق ہوا۔
ہفتے اور اتوار کو مرشدآباد کے مختلف علاقوں میں تباہی کے مناظر دیکھنے میں آئے۔ حالات کی سنگینی کو دیکھتے ہوئے کلکتہ ہائی کورٹ نے حساس علاقوں میں نیم فوجی دستوں کی تعیناتی کا حکم دیا۔ سُتی اور شمسیر گنج جیسے علاقوں میں رات بھر پیرا ملٹری اہلکاروں نے گشت کیا اور متاثرہ خاندانوں سے ملاقات کی۔
مغربی بنگال میں وقف ایکٹ کیخلاف احتجاج، پولیس اور مظاہرین کے درمیان جھڑپیں، گاڑیاں نذر آتش
ذرائع کے مطابق پولیس مظاہرین کے سامنے بے بس نظر آئی۔ مقامی افراد کا کہنا تھا کہ تین گھنٹوں تک جاری رہنے والی تباہی کے دوران پولیس کہیں نظر نہیں آئی۔ دھولیان میں ایک مقامی دکاندار نے بتایا کہ اُن کی دکان کو نذر آتش کیا گیا جبکہ اُن کی بیوی اور بچے شدید خوف میں مبتلا رہے۔
بی جے پی کے رہنما اور مغربی بنگال اسمبلی میں قائد حزب اختلاف شُوبھندو ادھیکاری نے کہا کہ ریاست میں ہندو محفوظ نہیں ہیں اور ریاستی حکومت مکمل طور پر ناکام ہو چکی ہے۔ انہوں نے الزام لگایا کہ کم از کم 35 ہندوؤں کی دکانیں جلائی گئیں۔ اُن کے مطابق وزیراعلیٰ ممتا بینرجی کی ’من مانی اور اقلیتوں کو خوش کرنے کی سیاست‘ اس خونریزی کی بنیادی وجہ ہے۔
وزیراعلیٰ ممتا بینرجی نے حالات پر قابو پانے کی اپیل کرتے ہوئے الزام لگایا کہ ’کچھ سیاسی جماعتیں مذہب کو سیاسی مفاد کے لیے استعمال کر رہی ہیں۔‘
مغربی بنگال میں یونیورسٹی کے قریب دیوار پرآزاد کشمیر اور آزاد فلسطین کے نعرے درج
اس وقت نہ صرف مرشدآباد بلکہ شمالی 24 پرگنہ اور ہوڑہ کے چمپدانی جیسے اضلاع میں بھی حالات کشیدہ ہیں۔ عدالت عالیہ نے یہ بھی تسلیم کیا کہ یہ پرتشدد مظاہرے کئی اضلاع میں پھیل چکے ہیں۔ ریاستی پولیس کے اعلیٰ افسر راجیو کمار نے شمشیر گنج کے متاثرہ علاقوں کا دورہ کیا اور سیکیورٹی اہلکاروں کے ہمراہ رات گئے فلیگ مارچ کیا۔
پولیس حکام کے مطابق اب تک 18 پولیس اہلکار بھی ان مظاہروں میں زخمی ہو چکے ہیں۔