’بدترین درندگی‘: جماعت اسلامی کے سابق سینیٹر مشتاق احمد کے بھائی صوابی میں قتل

صوابی میں جماعت اسلامی کے سابق سینیٹر مشتاق احمد خان کے بڑے بھائی شکیل احمد خان فائرنگ کے نتیجے میں جاں بحق ہو گئے۔ پولیس کے مطابق مقتول کو ان کے پڑوسی نے گولی مار کر قتل کیا۔
پولیس کے مطابق ملزم نے پہلے اپنے والد کو قتل کیا، جس کے بعد شکیل احمد خان بیچ بچاؤ کرانے کی کوشش کر رہے تھے کہ فائرنگ کا نشانہ بن گئے۔ پولیس کا کہنا ہے کہ ملزم نشے کا عادی اور ذہنی توازن سے محروم ہے۔
سابق سینیٹر مشتاق احمد خان نے واقعے پر شدید رنج و غم کا اظہار کرتے ہوئے کہا کہ ان کے بڑے بھائی کو بے دردی سے گھر کے سامنے قتل کیا گیا۔
انہوں نے کہا کہ بھائی ان کے لیے انتہائی عزیز تھے اور وہ ان کے دست و بازو تھے۔ انہوں نے واقعے کو بدترین درندگی قرار دیا۔
یہ واقعہ صوابی کے تھانہ کالو خان کی حدود میں پیش آیا، جبکہ پولیس مزید تفتیش کر رہی ہے۔